about me

أنا والمانجا في 2011

11:24 م


بسم الله الرحمن الرحيم 
السلام عليكم ورحمة الله وبركاته 
2011 سنة مليئة بالأحداث الحافلة 
فمن بعد ثورة تونس ومصر وليبيا
إلى سوريا واليمن 
أحداث سنبقى نتذكرها ونتذكر شجاعة الشعوب التي عاصرت المحن 
في أثناء ثورتها 
أحداث سنذكرها يوما ما لأبنائنا أو أحفادنا 
المانجا خلال هذه السنة 
بصراحة حدثت أشياء كثيرة في بعض المانجات 
بينما بعضها لم يحرك ساكنا 
فدعوني أبدا بالترتيب الموجود في القائمة 
ليس على الأفضلية طبعا 
بل على الأبجدية ^^

07-ghost
هذه المانجا كانت أحداثها حافلة خلال 2010 
وبالأخص خلال الماراثون الي كان قد دخله تيتو وفراو 
المهم خلال2011
شفنا إن هاكورين صار معلم لوريثة عين رافاييل
وشي ثاني 
أخيرا دخل تيتو وفراو مطقة أكاديمية الجيش 
مثل ما قلنا قبل هم إشتركوا في الماراثون 
عشان يدخلون مطقة الجيش بدون تصريح 

وبعدين شفنا إن تيتو لما طاح من المركبة 
وصار له نفس الموقف الي صار له لما كان صغير 
فإستعاد جزء من ذاكرته المفقودة >> الحمد لله ما بغى 
ودخلنا فلاش باك للي صار أيام الحرب لما كان صغير 
وشفنا كون كون و مارو كون والي معهم وشلون ماتوا
لسبب مجهول أحس إني حبيت كون كون 
وخلال هذا الوقت عرفنا إن هيوجا تدخل في الحرب بس الشي 
الي أنا أوب فاهمته ليش هيوجا ما تغير شكلة ؟؟ 
بس المهم إنه حلو 
وبكذا شفنا إن هيوجا كان بمثابة مفتاح الفوز لهم 
بحيث إنه هزم كل الي كانوا مع تيتو إلا عمه 
وعرفنا إن الجيش قدر يستخدم عين رافاييل في المعركة 
الي كنت أبي أعرفه ليش أبطالنا المصونين ما إستخدموا عين ماكاييل ؟؟
 وبعد هذا قدر تيتو إنه يتواصل مع هاذي البنت >> صراحة نسيت إسمها مرة طويل 
وعرف إنها مجبره إنها تشتغل معها أو ب من إرادتها 
وأشياء ثانية كثيرة كات شابتر كامل راح وهم يسولفون 
وبعد هذا شفنا الشينيجامي الي قبل كانوا 
>> عليهم أسطورة !
وشفنا وشلون تكلموا مع عم تيتو
وأخيرا عرفنا وش سالفة تيتو 
وليش كل كتاب تاريخي يتكلم بقصة غير عن الي صار للولد 
والحقيقة هي إن تيتو هو إبن عشيقة ملك راجس 
وإن زوجته كانت تكرهه كثير إلى درجة إنها سلمته لم أعداء أبوه 
وبعدها حطوا فيه صندوق باندورا -_- الشي الي خلاه 
الجسد المستقبلي لفيارورين 
>> الله يعظم أجره فيارورين الظعيف مبعد شفته يسوي شي ينكره عليه 
المهم بعد هذا طلع تيتو من أرض زيل 
وبكذا يكون تيتو قد أفاق وإنتهت غيبوبته 
يعني الحين رجعنا للحاضر أوب الماضي 
طبعا غباء بطلنا ما وقف عند هاللحظة
بعد ما أفاق وكمل شوي في الماراثون مع فراو 
وجلس يصيح >> يا كثر ما صاح 
وبعدها إكتشفوا الجيش إنهم دخلوا 
فطلع ايا تان وهيوجا لمهم 
الغبي تيتو راح يركض بيواجه أيا تان 
مبعد إستوعب إنه أقوى منه 
ومسكه أيا تان 
>> ما تدرون وش كانت مشاعري ذاك الوقت 
كانت سعادة لا توصف أخيرا أيا تان مسك الغبي تيتو 
والأزين من كذا إنه أفقده جزء من ذاكرته 
وخلى أخر شي يتذكره يوم كان في الإمتحان 
وإنك تراك نجحت وصديقك ميكاغي مات في الامتحان 
هههههههههههههههه
جلست أضحك بصراحة عليهم وسعة وجه 
هم الي ذابحين الولد وكذبوا على صديقة 
وشغلوه عندهم كـ تابع أيا تان أو شيء زي كذا 
وهنا تبدأ المصالة 
ومن بعد هذا الحدث للأسف ما قريت 
خليت أختي تقرا لي 
يعني أنتي إقري وعلميني إذا فيه حدث يستحق القراءة 
وشكله ما فيه حتى الأن 
 وبكذا أكون أنهيت المانجا الأولى 
ما كان فيها أحداث مثيرة 
>> هو أصلا المانجا أوب حماسية 
بس سبحان الله للحين أقراها 
أحيانا لأني أبي اعرف وش راح يصير >> مجرد فضول 
وأحيانا لسبب مجهول 
ما راح أقول إني أكره هاذي المانجا 
بس ما أتوقع إن فيه محبين كثيرين لها 
المانجا الي بعدها
  angel's doubt
مانجا جميلة لا أكثر من جميلة 
بلغت من الجمال ما بلغت 
لا الرسوم ولا القصة 
كل شيء فيها جميل 
ما نزل منها إلا 7 شابترات وللأسف ستورم إن هفن الفريق الوحيد الي يترجمها 
تخلى عنها >> أتوقع بسبب صعوبة الحصول عليها أو شي زي كذا 
لأنه حتى في المتصفحات الصينية أو حتى في المواقع المحجوبة ما نقدر نلقاها 
باختصار المانجا مقطوعة من النت للأسف 
عالعموم خلوني أتكلم عنها على الأقل 
 مثل ما قالت المانجاكا 
المانجا راح تكون عن العلاقات الإنسانية 
المانجا كلسك وتتكلم عن الإبن الرابع لعائلة غنية وعريقة 
بحيث أن أهله بما إنه الإبن الرابع ما توقعوا منه شي 
فما أعطوه أي شغل تبع العاءلة 
الولد إستغل الفرصة وطلع في رحلة البحث عن الذات مع شغال واحد صغير 
ومربي أو مدير أعمال 
عالعموم تبدا القصة لما فورث طلع لم مدينة وكان راح يحضر فيها حفلة 
ولما سمع زيز >> المربي 
إن الحفلة راح يحضر فيها إري ساما 
>> الإبن الثاني لعائلة غنية ثانية 
بس هي ما تقارن حتى بعائلة فورث 
إنه راح يحضر في الحفلة إرتبك وقال لفورث لا تدخل تكفا بتشوه سمعتنا 
>> لأن كانت بالأصل فيه إشاعات منتشره عن الإبن الرابع مثل ما يسمونه الناس 
إنه فاسق ويكب الفلوس مثل ما يكب الموية 
وإنه يحب يتزيين ويلبس من الزينة من والى 
هذا الي كان المفروض إنه في أيام ومان عيب على الجنتل مان إنه يتزين أكثر من الازم 
وفوق هذا إري شافه في الحفلة وهو جالس مع أولاد أوب من النبلاء من طبقة عادية 
واستغرب منه 
وبدا يتذكر الإشاعات الي تنقال عنه 
وبعد هذا طلع إري ساما من الحفلة ورجع البيت الي جالس فيه 
وشاف من دريشة غرفته شغال فورث >> ريكو 
لما كان بينزل لم البحيرة 
على فكرة للحين ما عرف إنه تبع فورث 
ريكو هو الي يزين الزينة لفورث الي يلبسها 
وكان بيقطع البحيرة عشان يجيب ورد من الجهة الثانية 
المهم طاح في المويه 
ودخله إري عنده وعطاه منشفه 
ومن هنا بدت اللقائات تكثر بين فورث وإري ساما 
خلال هذي الفترة إري كان يغار من فورث الي عايش حياته مثل ما هو يبي 
بس ما يقدر يترك شغله 
وبدا يحب يجلس مع فورث 
أو بالأصح نقول يصنع مواقف عشان يقابل فورث 
كان فيه فضول يدفعه إنه يجلس معه 
كان يبغى يعرف العلاقة بين فورث والولد الصغير الي معه 
>> ريكو 
الي المفروض إنه يكون خدام فورث 
بس الي شافه إري عكس الي يسمعه من الناس 
سواء بعلاقاته أو بكب الفلوس 
فورث كان جالس ببيت صغييييير 
والزينة الي يلبسها كانت كلها من الطبيعة أو أوراق مزينها ريكو 
صح إن منظرها يخلي الواحد يعتقد إنها فضة 
بي هي كانت أوراق بس 
وإكتشف إري شي ثاني إن فورث مدلع ريكو ويعاملة أوب كخادم لا 
كأنه أخوه 
>> أنا بصراحة شاكة إنه يكون أخو فورث 
مررة مررة يشبهه 
وفوق كذا فورث معاملته للناس شي ولـ ريكو شي ثاني 
الحين بخليكم مع مجموعة من صور المانجا 
>>> على فكرة الرسم شيء جميل
وإنتهت المانجا 
أوب إنتهت تم إيقافها >< 
بطالب عند حقوق الإنسان إنهم يكملونها >> وكأنهم بيسمعونك >\\\\\<
المانجا الي بعدها 
D.gray-man

المانجا بصراحة قرأتها عشان مس كاندي في البداية 
بس القصة بدأت تزين فجأة مع الرسوم بعد 
وكأن الرسامة تغيرت أو إنها فجأة بدت تتحمس 
بدا كل هذا من بعد المجلد 19 أو بالأصح بعد أرك الي مات فيه كاندا 
كان بالأصل بداية الأرك حلوة لين دخلت الحركات الهندية 
تقطع كاندا لين قال بس 
وسبحان الله يرجع بسرعة 
بس عالمجمل الشي الي خلاني للحين أقرا من بدايتها هو ألين 
مررة مررة حلو هذا الإنسان
المهم إن الأحداث ما فيها شي مررة مرررة مثير عشان تنقال 
بس المانجاكا مدري وش تحس فيه 
تجيب حدث بعدين تجلس مليون شابتر عشان تجيب تكملته 
أحيانا الواحد لازم يرجع يقرا شابترات قبل عشان يتذكر 
بس خلوني أقول أهم الأحداث الي أتذكرها 
لينك مات وألين صار مطلوب 
>> أخيرا راح مع النواز 
وبعدها إختفى ألين ليظهر كاندا مرة ثانية 
بطريقة أعجوبية لما ضحى الي مدري منهو ذاك بحياته عشان يرجع كاندا 
وكذا رجع 
إيه قبل هذا كله فقد كروس ماريان >> هم أصلا لقوه عشان يفقدونه 
فقد على شكل مقتول وهذا أحد أسباب الي أدت إنه يصير أشياء خلت ألين يطلع
فبدأ كاندا رحلة للبحث عن ألين وأخيرا لقوه بعدين هرب ألين منهم 
وبكذا يكون أخر شابتر نزل في 2011 
كل الشابترات الي راحت كانت سواليف وأشياءات تقهر 
بس بصراحة الرسوم صايرة شييء خوراافي 
مررة مرررة متغيرة من أول المانجا الي تحوم الكبد إلى الشيء الجميل الجديد 
وشيء ثاني المانجا فيها شوي لحسة مخ 
في ناس يجون ويطلعون مدري وش سنعهم 
 بس من الي كان يصد إن هاذي الرسوم
راح تتحول إلى هاذي الرسوم ؟

في النهاية ما أقدر الا أقول إن أكثر الشخصيات الي حبيتها هم ألين ولنك بس 
والباقين يجون في المرتبات الي بعد
أترككم الحين مع مجموعة من الصور 

المانجا الي بعدها 
donten ni warau


هاذولي 3 أخوان لا مثيل لهم 
تمنيت إن أخواني مثلهم 
فوق إن الرسم جميل هم وشخصياتهم أشياء ثانية 
مررة حلوين 
من أكبرهم تن ني إلى الأوسط سورامارو وإلى الأخير والأصغر شوتارو 
تأثيرات ورسوم القتال مرة حلوة 

إي صح نسيت أقول إنها كلاسيك بعد
أنا بصراحة أحب الكلاسيك بشكل ما أقدر أوصفه 
المانجا جديدة وفريق الترجمة ما قصروا الله يعافيهم 
بس بطيئين شوي ^^
ما ألومهم معهم مانجات كثيرة 
لو فيه طريقة أشتغل فيها معهم كان إشتغلت 
بس للأسف أتوقع النقص عندهم في المترجمين أكثر من المنظفين واللاصقين 
المهم الأخوان يمثلون القانون في المنطقة 
الأخ الكبير هو الي مربي أخوانه الصغار مثل ما هو واضح 
يدلكم عليه إنه مدلعهم ويخاف عليهم وللحين ما أتذكر إني شفت أهلهم 
وساكن معهم بالبيت واحد ما يشبههم أول ما شفته توقعته مربي أو شغال 
أو شيء زي كذا 
بس طلع صديق الأخ الكبير كان ناجي من معركة وأخذه تن ني معه للبيت قبل 10 سنوات 
وبكذا صار يشتغل مع تنكا 

الي فهمته بعد إن سورا مارو وشوتارو ما يعرفون إن الشغال يشتغل مع تنكا 
لأنهم يعتبونه مثل المربي أو شي زي كذا 
ولما طلع مرة سورا مع شوتارو 
لحقهم الشغال بدون ما يدرون 
على فكرة هو نينجا
 تمنيت إن أي أحد في هاذي الحياة يقولي صيحي بالكثر الي تبينه 
بس كلهم يقولون لي لا تصيحين 
>> طيب الصياح يطلع الهم ويوسع الصدر



بعد الشابتر الأول 
نزل شابترين الي فهمته أو الي أتوقعه إنها قصة أبو الأخوان الـ3
وفيه شخصية ثانية في الشابترين الثاني والثالث مدري منهو 
خلوني أكون صريحة ^^
أنا ما قريت 2 و3 
بس 1 و 4 
الثاني والثالث خليت أختي تقراهم 
ولدهم الجميل هذا >> شغالهم
مرة مرة حلو 
يكفيكم يوم سفع شعره غدا وش زينه 
حتى وهو محيوس
رسمه رهييب 
شيراسو أتوقع إسمه 
المهم إنه حلو توه راجع من مدري وشو 
في النهاية المانجا ما والت مسترمة 
والشابترات الي نزلت عن المانجا الأساسية 
بس 2 ولا أقدر أقول فيهم شي كثير 
بس أنصح في قرائتها
kuroshitsuji

أولا وقبل ما أتكلم عن المانجا 
الكل يعرف يانا 
والأحداث الغريبة الي تجي في بالها 
قبل 2011 
كان في أركات جميلة جدا 
الأركات الي أذكرها 
أرك جوكر وأرك إرل غراي 
الي طلع في النهاية الإرل هو القاتل 
يا سفاب الوقت الي ظيعوه والقهر إن ما فيه أحد عرف عنه إنه هو القاتل 
عالعموم 
تبدا الأحداث في 2011 بعد ما ركبوا السفينه 
وبدت الزمبي تتحرك 
طبعا الكل يعرف إن دريت له دخل بالموضوع 
بما إنه دكتور
المهم الشابترات كلها راحت على السفينة 
الحدث الوحيد الي حسيته جذبني لما صارت 
ليزي تقاتل بالسيف 
الدلوعة طلعت على حقيقتها أثر أمها كارفتها بالبيت 
وهي الي يقالي تراني نويعمة 
زاد من شاف وجهها درا إنها تستكوت عمرها 
وشي ثاني سناك الي مسكوه ولعبوا عليه للحين أتذكر وسعة الوجه الي فيهم 
ذبحوا أهله وجو يصيحون عنده هنا ترانا ما ندري وش السالفة 
عقبها الظعيف راح معهم إنكم أهلي الجديدين >> مسكين 
هذا سناك أبو عيون صفر -_-
المهم طلع أخيرا أندر تيكر 
من زمااان عنه عقب ما تقاعد مدري وش رجعه لم الشنيجاميين !!
بس أخيرا سفع شوشته وورانا عيونه طلع مملوح ^^
وفي شابتر يجيبون فيه مشاعر ليزي المسيكينه أول مرة أرحمها 
لما قالت أنا أبي ألبس مثل البنات الي بعمري بس ما أقدر 
ضاق صدري عشانها
وإلى هنا أتقوع أخر شي نزل ^^ 
mushishi
Ginko Mushishi

Mushishi

يمديني عليها !?
المانجا قرأتها بين يديني أوب من النت 
إستعرتها من مس كاندي 
وهي أول مانجا أقرأها بكتاب 
الكلام لا يكفي لوصف الجو الي عشته 
من كثر ما أدخل جو فيها 
كنت أعيدها أكثر من مرة 
وفي كل مرة أدخل جو أخر 
ولا أحس بالي يصير حولي أحيانا لما يناديني أحد أفز وأتروع 
من كثر ما أنا داخلة معهم 
وفوق كذا الجو الهادي يهدي الي يقرا
والرسوم الي تدخل مباشرة إلى القلب 
أحس المانجاكا راسمة بكل مشاعرها 
الأحداث والأركات شي جميل 
المانجا بس 10 مجلدات بعد ما قريتها حسيت بإنتعاش وإقبال على الحياة 
الي يشوف الأنمي شي والي يقرا المانجا شي ثاني 
مع إن المشاعر متقاربة 
بس لما قريت المانجا 
كنت أقرا صفحة بعدين أسكر الكتاب وأجلس أتفكر بالجمال الي فيها 
إلى درجة إني حسيت إن الدنيا جميلة أكثر من الجمال الي كنت أعرفه عنها قبل 
كثيرين بيقولون خرافات ومالها داعي 
بس أنا أقول هذا شي لا أحد يتكلم فيه 
مرة مرة جميلة 
Mushishi
الأجواء الي عشتها راح تبقى في ذاكرتي 
أشياء جميلة وناس وشخصيات أروع 
المانجاكا أبدعت بحق 
وخصوصا قصة جينكو 
Mushishi
هاذي الصورة فان أرت بس عجبتني 
نزل في جينكو أتوقع على ما أذكر شابترين 
واحد منهم لما لقته نوي وربته وبعدها لما فقد ذاكرته بعد ما طلع من التوكويامي
والشابتر الثاني لما لقاه الرجال الي رباه 
وطرده بعد فترة مرة قهرني هالإنسان ينطرد عشانه غلط وهو كان ناوي يساعد 
ضاق صدري عليه 
Ginko Mushishi
الأحداث كثيرة عشان كذا ما ودي ألخص 10 مجلدات كاملة 
وفوق هذا التلخيص راح ينتهك كل حقوقها
pandora hearts

لحظة تأمل 
هاذي أفضل مانجا بالنسبة لي حتى الأن 
لو قالوا وش تتشترين مانجا وحدة بالوجود بس قلت باندورا هارتس
فهنا لازم أتكلم بالتفصيل
لأنها كانت حافلة بالأحداث يبدا أرك وينتهي أرك ويبدا وراه ثاني 
أخر شي نزل في 2010 
كان لما غيل راح لم بريك وساعده 
وإستخدم لأول مرة ريفن بالعلن 
وفي 2011
وأخيرا بريك رضا بالمساعدة في البداية كان ناوي ينتحر ويقتل الباسكافلس معه 
بس لما جا غيل أخيرا هون
وقاتل غيل مع بريك ظهر لظهر 
وإكتشفنا إكتشاف خطير بصراحة أسعدني هو إن ليم سان حي 
أخيرا بريك تطمن 
والشيء المحزن فانج المؤدب مات T^T
وهو يدافع عن ليلي أكثر وحدة أكرهها من الباسكافلس
وعرفنا الي صار مع أوز والي خلاه يحقد على يورا 
لما تكلم عن الأبس والناس الي أغراهم فيها 
يقولهم الأبس زينه ملونه كاذب عليهم يبي يعيد مأساة سابري 
وبعد كذا راح أوز مع فنسينت وإيليوت 
يدورون أليس وريو 
يا ليتهم ما جو للحفلة صار أشنع شي في المانجا هنا 
وبعدها تفرقوا 
فنسنت فوق عشان يكسر السيل 
وإليوت راح يدور ريو 
وأوز إنهبل لما شاف أليس وراح ينقذها ولما نزل شاف فيليب 
وإعتذر له بعد ما عرف إنه أحد متعاقدي هامتي دامبتي 
وعلمه إن أبوه ميت 
بعدها بدا أوز يقاتل 
الشي الي لفت إنتباهي هو إن علامات المتعاقدين غير الشرعيين بدت تطلع على أوز
هذا يعني إن السيل حقه تحرك كثير
وبعد ذكا إنتقلنا إلى إليوت الي أخيرا لقا ريو وهنا بدت مأساة إليوت 
لما شاف أمه مع يورا وهو الي كان يحسبها مريضة مع أخته 
بعد هذا شفنا بريك يوم نوا أخيرا يعلم غيل عن شي 
ورجعنا لم أوز وهو عند يورا 
وقاتل أوز يورا 
كنت أحتري هاللحظة من أول ظهور ليورا -_-
كنت ولا زلت أكرهه 
أوز تغير مرة طلع كشخة في هذا الشابتر 
كل ماله ويكبر ويزين ^^
المهم أخيرا أليس وقفته في اللحظة الأخيرة لما علمته إن الوقت كان كذبه بس عشان يخدعونه 

ومن هنا إلى إليوت الي مسك أمه قبل ما تذبح ريو 
يا حياتي حياة إليوت لو هو عندي ما طلعته من البيت عشان ما يجيه شي 
وبعدها بدت حالات إليوت الظعيف حتى أمه سألته تقوله وش جاك؟
ثمين قاتل له ميخالف لا تخاف بينتهي كل شي
وراحت تتذبح ريو 
وهنا وقفنا عشن نروح لم أوز
الي كان عند يورا وأخيرا قتله 
كان أسعد شابتر مر على تاريخ هالمانجا 
أو بالأصح لما كان جاك هو الي ذبح يورا 
وبكذا أخيرا نقدر نقول يورا أخيرا إنتهى للأبد وعساه ماعاد يطلع مرة ثانية 
وبعد ما قته أوز شاف شوي من ذكريات جاك
وطلع فيها غلين
وتكلموا عن هامبتي دامبتي الي مع النايتراي 
وبعد كذا فجأة صرنا عند إليوت الي صحا ولقا نفسه قاتل أمه ولا يعرف كيف؟
بعد ما شاف نفسه قاتل أمه تذكر أشياء كان ناسيها 
تذكر إنه هو الي قتل أخوانه 
يعني تتذكرون إليوت لما كان يدور على الكوين أوف هارتس الي قتلت أخوانه 
طلع في النهاية هو ولا يعرف كيف 
ليش هو؟؟ وليش نسى؟
لأنه المتعاقد الأساسي مع هامبتي دامبتي 
ومن خصائص هامبتي دامبتي إنه يلعب بالعقل
فإذا قتلت ينسيك وإذا شفت شي المفريض ما تعرفة ينسيك
المهم يحووس المخ 
وكل شي 
بعد هذا إختلط كل شيء على إليوت 
وشلون تعاقد >> هو أصلا ما يذكر إنه تعاقد 
وبدت الذكريات تجي ورا بعض لين تذكر ذاك اليوم الي راح فيه لم سابري 
وهوجم 
وعشان ما يلعب هامبتي دامبتي مرة ثانية بعقلة قعد إليوت يقنع نفسه وقدر يقوى هامبتي دامبتي وبكذا 
تذكر إليوت كل شي وياليته ما تذكر
خلال ما إليوت يتذكر كان عنده ريو وللحين مصدوم وش بيقول لإليوت 
أنا الي خليتك تتعاقد عشان أنقذ حياتك؟
بيقوله لو إنك مخليني أموت كان أزين 
بعدها تذكر إليوت كل شي 
من يوم طلع من بيت فيونا إلى إن هوجم ونزف 
وخلاه ريو يتعاقد عشان ما يموت 
وهنا لما تذكر إليوت عرفنا شيء عجييييب 
هو إن ريو هو الجسد الجديد لغلين أوب غيل 
وبعدها نزل الشابتر الي بعده 
لما صحصح أوز واستوعب إن جاك قتل يورا
وقام يقاتل الناس الي
منتحلين شخصية الباسكافلس 
وكان بهذا الوقت فنسنت راح يكسر السيلنج ستون 
لما وقفه غيل في اللحظة الأخيرة  
لما تذكر كلام بريك 
الشي الي بريك عمه غيل كان 
إن فنسنت صار مع الباسكافلس 
وإنه راح يكسر السيلنج ستون
ياعمري عمر غيل خلال الأركات الأخيرة صار إنسان خارق الكل يعتمد عليه 
فنسنت من جهة وبريك من جهة ثانية 
وأوز وإليوت 
والكل يعتمدون عليه أتوقع لأنه أعقل واحد 
المهم إنه إنكرف كرف أوب طبيعي 
رايح جاي من أوز إلى بريك وبعدها يرجه عشان يوقف فنسنت بعدين يروح لو أوز مرة ثانية ><
وبعد هذا شفنا وشلون الأشياء إختلطت في راس أوز وتذكر أشياء ما كان يتذكرها 
وبعد هذا واحد من الباسكافلس أخيرا كسر السيلنج ستون 
ولما إنكسر شفنا وشلون الناس المتعاقدين إطربوا كثير 
بسبب الموجات الي يحسون فيها 
بعدها نزل غير على طول لم أوز 
وبعدها شفنا إليوت الي ماعاد صار قادر على إنه يسيطر على هامبتي دامبتي 
يبي يحاول يسوي أي شي وبالموت يقدر 
بعدها شفنا هامبتيات كثار طلعوا عند أوز وغيل 
وكان إليوت يشوف من عيون الهامبتيات 
ويشوف غيل وأوز 
ما صدق فالي سواه بنفسه عشان يكوم إنه دخل السيف في يده 
 
بعدها جا فنسنت وكلم إليوت يقوله من كان يتوقع إنه أنت الي سويت هذا
أنت أخر واحد كنت أتوقعه 
وعلمه عن هامبتي دامبتي 
وقاله لا ترفض سلسلتك عشان ما تموت 
بس الي أبي أعرفه ليش فنسنت قال لإيليوت لا ترفض السلسلة 
عشان ما يموت في حين إنه قاله بعدهذا 
إختار أنا أو أوز من الي بيذبحك 
صراحة أنا ما أدري هل هو تبع تفكير اليابانيين المقحط أو إنه إذا رفض السلسلة راح يصير ينسحب للهاوية ويتحول سلسل؟
بصراحة ما أدري المهم بعد هذا إليوت قال :هااه أنتم تذبحوني أنا!؟
>> يا ناس أحب هالإنسان 
وقال : هامبتي دامبتي أنا أرفضك 

وإختفى هامبتي دامبتي ومات إليوت
.........................................
لحظة صمت 
إليوت كانت أول شخصية مانجا أو أنمي أتأثر بموته 
هذا التأثر 
إذا فكرتوا فيها كان إليوت دايم يقول إنه راح ينتقم من الي قتل أخوانه 
الي هي كوين أوف هارتس 
وفي النهاية صار هو الي قتل أخوانه وأمه بعد 
والمصيبة العظمى إنه ما يعرف عن نفسه 
كان دائم يتكلم عن الشيم والأخلاق بفخر إنه من عائلة نايتري 
وفوق هذا وعد أوز إنه يحسن العلاقات معه بين نايتراي وفيزاليوس 
ونزل الشابترا بعده وهم لابسين لبس العزاء 
بس وش يسوي هذا عند إليوت 
وكذا يكون أرك حفل يورا إنتهى بموت إليوت 
ورجعوا للباندورا بس وش صار على الباقين ؟
غيل إنسبه بشكل غير طبيعي وشلونلا 
وهو أكثر من تحمل الأعباء وفوق هذا 
لقا أخوه إليوت ميت 
والسيد نايتراي >> أبوه بالتبني مفقود 
وفنسنت بعد مفقود والشي الأعضم إنه راح مع الباسكافلس 
حتى إن شارون لما قالت له إن بريك في غيبوبة بعد ما إستخدم سلسلته 
قالت له ميخالف لازم تصيح شوي على أخوك 
قالها أصلا ما أقدر 
نظرته كانت شي تحسون للحين تحت تأثير الصدمة وكأنه ما صدق 
وبعد هذا جابوا حالة أوز الي هو الثاني ما يدري وش يسوي 
حتى إن أليس تقول أنا كنت أشم معه ريحة سلسلة من قبل بس ما تأكدت 
بعد هذا شفنا إن روفوس باراما عرف أشياء كثيرة عن إسولا يورا 
ثمين شفنا الباندورا الي جالسين يستجوبون ريو 
لأنه الوحيد الموجود مكان موت إليوت 
وشفنا إن فنسنت جا وهربه من المكان 
علشان يوصله كلمات إليوت الأخيرة
لأن فنسنت كان عند إليوت وقاله إليوت 
وشفنا في الشابتر الي بعده لما جا الدعم من الباندورا علشان يوقفون فنسنت فهاجمهم
هنا طلعت سلسلة فنسنت الحقيقية 
وإنه هو صار كوين أوف هارتس 
بعدين أخذه معه 
وهرب وراح لمكان الباسكافلس وقاله أنا أعرف إنك غلين الجديد وعلمه إنه كان يعرف أشياء كثيرة من يوم كان صغير 
وقاله وش الي صار لما راح وعلم نايتراي عن إليوت 
قال أبوه إليوت مات بفخر مثل ما كان يبي 
هذا الي قهر فنسنت فقتله لا إراديا ^^ 
سوا خير فينا وفكنا منه 
وقبل لا يذبحه كان قد علمه إنه هو الكوين أوف هارتس 
وإنه قد هاجم غيل عشان يبعد الشك عنه 
وإنه قتل ناس بالحفل عشان يبعد الشك عن إليوت 
ماكان يبيهم يعرفون عنه إنه متعاقد أو شي مثل هذا 
بعدين جلس يتذكر إليوت لما كانوا صغار 
كان غير أخوانه كلهم هو الوحيد الي كان يجلس مع غيل وفنسنت 
ضاق صدري لما قال فنسنت لإليوت أنا حبيتك
أنت الوحيد الي كنت غير أخوانك 
شكرا لأنك ساعدت غيل إنه يتأقلم بهذا البيت 
بصراحة كل ما شفت هاذي الصفحة جلست أصيح 
لييييش من بييين كل الناس فننسنت يقول لشخص أنا حبيتك 
ليش كل ما حب فنسنت إنسان فقده 
أولا غيل فقد ذاكرته وفنسنت يمووت فيه 
والحين إليوت
ليييش مررة مرررة أنقهر فنسنت يا حياتي بس 
المشكله إنه يبتسم حتى أخر لحظة
بعدها مر شابتر ما فيه شي إلا أن بريك أفاق أخيرا 
والحمد لله هالمرة سليم ما فقد أحد حواسة مثل المرة الي راحت 
وفي نهاية الشابتر إلتقا فنسنت وريو وإيكو  بـ أوز وغيل وأليس
شفنا وشلون فنسنت قلب الولد 
وأقنعه إنه يسفع شعره 
والشابتر الي بعده نزلت كالارنج جديدة
يازيينهم يا ناس
هذا الشابتر كان أغلبه كلام ليس إلا 
خلاله عرفنا غن ريو يغطي عيونه لأن أمه كانت تقوله لا توري عيونك الناس 
لأن لونهم غريب 
وشي زي كذا بعدين أبوه مات يوم كان صغير وأمه قتلت يوم صار عمره 12 بس 
أتوقع إنه متوقعين يكون جسد غلين عشان كذا أمه كانت تقول له غط عيونك لا يشوفها احد 
وبعدها ودوه لم الميتم 
وهناك إلتقا بإليوت وبدا يتكلم عن إليوت 
>> يفتح جروح مسكرة
وأخيرا هنا وخلال هذا الشابتر قالو وشي هي أمنية إرادة الهاوية 
>> ماراح أخرب الأحداث ^^
وطلب ريو من أوز إنه يساعده في الي يبي ه بس أوز رفض 
ونزل شابتر بعده تقاتل فيه أوز ضد ريو
وإطروا إنهم يرجعون لم الباندورا
وخلال هذا كانت شارون مع بريك لما لقوا إن جدتها الي كانت مع روفوس باراما
مهاجمة ><
وبكذا روفوس بارما صار خائن لما هاجمها

ولما رجعوا للباندورا تتبعوا روفوس وإكتشفوا إن السيلنج ستون الأخير موجود في الباندورا
وقالت جدة شارون إن روفوس سرق منها مفتاح الباب
وهذا الي خلاهم يفقدون أعصابهم
وبكذا جا ريو ولحق أوز عشان ينهي الي بداه في المدينة
لما بدا يتهاوش مع أوز
وعصب عليه أوز
وفي هالوقت كان بريك قد وصل لم روفوس
وغيل بالطريق يتبعهم
بس وصل أخيرا وإكتشف إن الي بالسيلنج ستون هو رأس
يعني هذا الأخير
وجا فنسنت وكلم غيل وكأنه يقوله يا غيل ترا ماله داعي تستعيد ذكرياتك تراها أوب زينه
ولما تكلم غيل
وخبص الدنيا عرف فينسنت إنه ما إستعاد ذاكرته بس فجأة لما صرخ فنسنت بوجهه تذكر موقف له وهو صغير
وفجأة إنتبه إن فيه أحد بيهاجم فنسنت
وفي هالوقت كان أوز يهاوش ريو
ولما بدا ريو يسمع لأوز وبدا يصحصح
وبدوا يتصالحون فجأة أوز مد يده لريو
فجأة تحركت السلسلة وجاك أصاب ريو
وبكذا نرجع لم غيل الي كان فجأة يداع عن فنسنت وأصابته رصاصة المسدس
وصار له نفس موقفه يوم كان صغير
فتذكر جزء من ذاكرته في أيام مأساة سابري
لما دخل غرفة جاك و غلين
وصرخ بوجهه غلين يعني لا تجي
وجاك ضرب غيل بالسيف
هنا بدت لحسة المخ
أوب المفروض العكس يصير
على حسب الذكريات الي شفناها بالشابترات الي قبل كان دائم جاك هو الطيب وغلين العكس
بس هنا عرفنا شي ثاني
إن غيل ما كان سيده جاك لاكان غلين
وشيء ثاني لما غيل تذكر وش قال جاك
قال لغلين لا تخاف شغالك ما يموت بسهولة
هنا مرت ذكريات على غيل في نفسه يقول
الحين فهمت ليش ظربات مثل هاذي ما تقتلني
وتذكر كل الضربات الي أصابته
وفجأة في الحاظر إنكسر السيلنج ستون
وطلع الشيء الي بداخلة
ما طلع راس جاك مثل ما هم عارفين
طلع راس غلين
>> يا حياتي نظراتهم يرحمون
فجأة بدا غيل يوجعة راسه بقوه بسبب الصدمة وبدت الذكريات كلها ترجع
في هالوقت جاك قال لأوز أنت غمض عيونك وأنا بعلمك كل الي صار من البداية عشان تعرف
وبكذا نكون أخيييرا شفنا وجه ليسي
وعرفنا منهو الي لقطته من الشارع
ما كلن غلين مثل ما توقعنا
صار جاك هو المجدوع
ولما سمع روفوس صراخ غيل
قال الحين تأكدت إن الي بالسيلنج ستون هو راس غليون أوب جاك
وبكل برود يقولها
وعرفنا إن جاك إبن عشيقة من عائلة فيزاريوس وعشان كذا هو مجدوع الحين
شفنا وشلون ليسي أخذت جاك معها ومشته وعلمته إن الدنيا ما تسوى عشان يضيق صدرك عشانها
وبعد كذا جابت له أكل ووكلته
الحياة الي كا مان يتمناها صارت له
وقصت شعره وزينته
وبعد فترة جو ناس وهاجموهم
هذا الشي الي خلا ليسي تحقد عليهم وتهاجم بسلسلتها
وهذا خلا الباسكافلس يلقونها
وبكذا ليسي تركت جاك وقالت له المرة الأولى أنا الي لقيتك
ويجي دورك للمرة الثانية عشان تلقاني
ومن هنا بدا جاك يدور على ليسي
سوا المستحيل عشان يدخل للطبقة النبيلة مرة ثانية
ويوم كبر أخيرا قدر يلقاها في حفلة لما كان يقشتغل على شكلعازف كمان
وبكذا نكون بدينا أرك الفلاش باك
ونزلت كولورنج جديدة 
تكفي بس الخلاقين الي لابسها >> يضيق الصدر ><
هنا عرفنا أشياءات كثيرة 
غلين الي قبل ما كان الي إحنا نعرفه أولا 
والي كنا نعرفه صار أخو ليسي وإسمه أوزولد @_@
وبعد ما إلتقا جاك بليسي في الحفلة صار كل يوم يجي يدخل عن\هم 
ويتسلل للقصر عشان يشوفها 
وبكل مرة يصيده أخوها ^^ 
وأخر شي يخليه يدخل 
الشي الي ما توقعته ابدا إن يكون لجاك علاقة بميراندا باراما
أنا لسبب مجهول ما أحب هالإنسانة 
والحين شفتها تلعب بالجثث -_-
بعد هذا نزل السابتر الي عرفنا وش صار فيه لليسي 
وعلشان يصير أخوها هو غلين الجديد 
لازم تموت هي بالمقابل >>> حالة مأساوية 
واتوقع إن أخوها ما يعرف 
مشكلة صراحة 
أخوها برا يلاقي جاك علشان يوديه لم أخته ^^ 

المسكينة ليسي من يوم كانت صغيرة وغلين يقول لها إذا صار أخوك هو غلين الجديد 
راح تدخلين الهاوية 
وهي بزر تسأل أقدر أرجع؟
يقولها لا وترا الأبس لونها أسود 
ويروعها المسكينة 
ولما كبر أوزوالاد بدأوا طقوس نقل السلاسل لمه >< 
وأخته تشوفه وساكته 
وتتذكر نفسها لما كانت صغيرة وغلين يعلمها 
لما قالت له أجل هذا يعني إن الي بيذبحني هو أخوي صح؟
>> رحمتها بصراحة 
وبعد كذا جينا للجزئ الأروع 
الحين وفي هاذي اللحظة طلع غيل وفنس من بيتهم >> هاجين 
علشان فنس 
وبهذا عرفنا شيء مهم 
الشي الي دائما فنس يسأل نفسه : ليش أمي جدعت غيل معي ؟
والجواب هنا ^^ 
غيل أصلا من الباسكافلس 
لما قال انا أشوف ذاك النور وأسمع ذاك الشخص يناديني 
هذا أكبر دليل على إنه من الأشخاص الي إختارتهم الهاوية 
وبكذا يكون أخر شابتر نزل وإكتمل 
أشياااء كثيرة ودي أتكلم عنها 
بس المكان ما يكفي >> بخلي مكان للمانجات الثانية ^^"

Reimei no Arcana


مانجا غريبة بس أوب مرة حلوة 
فيها شي غلط بس ما أدري وشو 
وفوق كذا هي شوجو 
أهم شي يكفي عقيل الي معهم 
هههههههههههههههههه ليش ما إختاروا من بين كل الأسامي العربية الا عقيل

Toxic


مانجا عجيبة وغريبة 
حلوة من البداية ما عليها بس الي نازل بالإنجلش 7 شابترات 
مع إن الراو نالزل منه أتوقع 3 مجلدات وشوي 
المهم إنها حلوة وبس
ورسومهم حلوة بعد 
وغير كذا القصة فيها شي أو نوع من التاراجدي أتوقع
مع إن تصنيفها بس أكشن وشوجو ودراما 
بس من شفت ذاك الولد الي أبوه يسوي عليه تجارب o_O
رحمته وهو الي قاعد يتفاخر بعمرة 

Vampire Knight


ما أتذكر إنه فيه أحداث مهمة
صارت >> الكل يعرف هينو 
لازم تسوي مطمطة أحداث 
لين يصير طول الحدث مجلدين أو 3 على غير سنع 
كل هذا تبي تكثر فولماتها 
ما أدري ليه تبي تخلي السلسلة طويلة 
الله يصلحها بس
أنا ما قريتها خليت أختي تقراها وتعلمني أهم الأحداث وبس  



وبكذا أكون الحمد لله قلت كل الي قريته خلال 2011 
>> ما أحس إني قريت كثير 
بس عالعموم السنة إنتهت وحنا الحين في سنة جديدة 
وإن شاء الله تكون سنة خير علينا كلنا 
والسلام عليكم ورحمة الله وبركاته




You Might Also Like

6 التعليقات

  1. السلام عليكم و رحمة الله و بركاته
    ساكوراااا تشششششان اريغاتووووو
    جد جد ششكرا ع التقرير الروعه حق باندورا , هو وقفت عن قراءة من المانجا من الجزء اللي غيل ساعد بريك فيه و تفرمت اللاب و لا عاد عندي الرابط نفسه فجد فرحتيني بمعرفه الاحداث اللي صارت باختصار ^^
    بس لسى في سؤال يسدح نفسه : وشو امنيه الابيس ؟ ما بقرا المانجا و لا بتحرقينها علي فعطيني اياها كاش خخ ^^
    بانتر التقرير الجاي عن الشابترات الجديده لباندورا ^^
    مشششكورة مره ثانننننيه =)
    و موفقه ^^

    ردحذف
    الردود
    1. وعليكم السلام ورحمة الله وبركاته معلييش أختي سمااء
      إطررت إني أترك المدونة لفتررة طوييلة ولا إنتبهت لردك ^^"
      بجد بجد سووورييي
      العفوو التقرير من يومياتي المانجاوية خلال السنة ^^
      ههههه ما أقدر أحرقها عليك راح يخرب طعم المانجا
      راح تقدرين تقرينها في متصفح manga reader
      المتصفح هذا يوفر كل المانجات ^^
      لو أحرق عليك بتخرب كل المانجا فأفضل إنك تقرينها بنفسك ^^
      يلا لا تفوتينها لازم تقرينها
      العفووو وما سوييت شي
      بالتوفيق إن شاء الله

      حذف
  2. مشكورة ..

    ردحذف
  3. خلصت بندورا هارتس .. وجلست ابكييييي النهاية تقتل..اول مرة اقرا شي وابكي كدا..

    ودي جري مان وقفو لهم سنتين.. مدري ايش وضعهم..ومرررة مشكورة عالتقرير.

    ردحذف
  4. shiry أنا كمان خلصت باندورا وألمتني النهاية بقوووووة خصوصا موت الشخصيات واحد بعد الثاني T^T
    أما دي جراي مان فلأن المانجاكا مريضة >> لها انستجرام على فكرة
    إذا تبغيه أضيفيني في انستجرام @Aouko وأرسلي لي دايركت لأعرفك وأعمل لك منشن على حساب مانجاكا دي جراي مان :)

    ردحذف